蜜糖芥末籽汁烤雞翼 (附食譜)

夏天過咗一大段啦，好快又會到秋天，

講就講得易，以香港嚟講秋涼仲係有排嘅事，

但係芙芙已經好想念BBQ啦，因為燒雞翼~我鍾意食~。

前排喺超市買咗樽特價芥末籽醬，一於用佢嚟醃雞翼，

唔燒都烤下，一解芙芙對BBQ嘅單思之苦。

蜜糖芥末籽烤雞全翼 食譜

材料：雞全翼4隻

醃料：老抽、鹽、生抽、糖適量

蜜糖芥末籽烤汁：蜜糖2湯匙、芥末籽醬1湯匙、鹽少許、油少許

1. 雞全翼洗淨後抹乾，將醃料均勻地塗抹於雞全翼上。

2. 將蜜糖芥末籽烤汁放入密實袋中，再將雞全翼倒入醃大約2小時。

3. 焗爐預熱200度，於焗盤放上鍚紙及掃一層油。

4. 雞全翼取出放於焗盤上，烤汁盛起備用(不要倒掉)。

5. 以200度烤正面15分鐘，反轉再烤10分鐘。

6. 再反轉至雞全翼正面，掃上烤汁。

7. 以220度再烤10分鐘，即可。

個烤汁調出嚟就係咁嘅樣，芥末籽有少少酸，

所以要用蜜糖中和，真係perfect match呀。

用密實袋裝住汁料嚟醃食物，可以令食物更容易沾到醃汁，

咁就可以更加入味，方便保存又乾淨。

芙芙喺雞中翼位置界咗幾刀，方便醃入味。

睇下個樣係咪似足燒雞翼呢？味道甜甜哋，

而且入面仲好多肉汁，一啲都唔乾呢，

睇嚟下次BBQ，可以製個自家醃雞翼都得啦，

唔駛出去買，真係好好味呀。