<美的健炸寶> 健康小食_脆炸芋片芋絲

隨住小菜苗一歲，芙芙大肚時嘅回憶都返哂嚟，

相信好多孕媽媽有第一胎時，頭幾個月甚至成個孕期都會好小心飲食，

芙芙都唔例外，頭3個係咁上網搵健康孕婦食品，

走去自製西柚汁飲，又日日食蘋果，

完全唔敢掂任何熱氣食物，好怕BB出世後皮膚會唔好，

連一滴咖啡都唔敢飲，一粒朱古力都唔敢食，

諗返起都覺得好偉大，咁為食嘅我都忍得住。

呢種偉大大約去到第5個月左右就減咗半啦，

好快地，我就冇再忍口，

會買少少薯片食下過下口癮，不過在選擇上，

就會揀啲天然嘅番薯片、芋片等，

仲要揀啲有organic字嘅(其實都係俾自己良心好過啲)。

喺收到美的氣炸鍋後，芙芙好快就決定要炸芋片，用嚟回味下懷孕時嘅感覺，

因為嗰啲寫住Organic嘅蔬菜片入面，最好味就係番薯片同芋片，

不過街買唔及自己整咁放心，而且仲可以自己選擇鹹定唔鹹添。

脆炸芋片芋絲 食譜

材料: 芋頭1個、植物油適量、鹽適量

1. 將芋頭去皮，一半切薄片一半刨絲備用，再分別以適量植物油及鹽拌勻。

2. 美的健炸寶預熱190度5分鐘。

3.  脆芋片做法: 

將芋片鋪於炸物籃中，以190度烤約20分鐘，中途翻動幾次，

炸至理想硬度即可取出，放涼食用。

4. 脆芋絲做法: 

將芋絲鋪於炸物籃中，以190度烤約10-15分鐘，中途翻動幾次，

炸至理想硬度即可取出，放涼食用。

芋片剛剛氣炸時還是有點濕濕的，在氣炸10分鐘左右時，

濕氣已沒了一半，像下面第二張圖片咁，
一半實色一半透明，繼續氣炸再翻動多一兩次就變成脆片了。

 
 

芋絲因為太幼，氣炸時間亦會短一些，
每次取出翻動時，芙芙只是直接握著手把位輕輕拋幾下，
拋鬆一點芋絲，好讓中間有空間炸到每一條都脆口。

 
 

呢個炸芋片嘅方法，同樣可以製作去蘋果脆片，
第時小菜苗大個啲，芙芙都打算整啲蘋果脆片俾佢做小食，
好過出街買啦，保證新鮮好味，而且有營養，俾小朋友食都唔怕啦。