小菜苗剛剛踏入一歲生日，喺佢仲係十個月大嘅時候，
芙芙已經留意有咩Finger food可以俾佢練習下咀嚼，
通常都離不開係節瓜條、蘿蔔條、菜心莖等等，
今次就同大家介紹個好簡單嘅自家製手指餅，唔洗落麵粉，
只係用到3種食材就搞掂，再用上美的健炸寶，
連火都唔駛睇下，快速完成呢道寶寶美食。
氣炸鍋原理同焗爐其實係一樣，都係用上對流風將食材烤熟，
只係氣炸鍋嘅對流風較強，強到可以將油份逼出，
做出油炸效果，所以氣炸鍋同時可以當成迷你焗爐咁用，
之前芙芙都用美的健炸寶焗過麵包布甸、蛋糕，
效果非常之好，詳情可以睇以下連結：
<阿華田 x 美的健炸寶食譜> 阿華田麵包布甸
而今次呢款寶寶食品，都係利用以上原理嚟烤焗架。
蔬菜薯泥手指餅 食譜
材料: 薯仔1隻、菠菜1棵、甘筍1/3條、植物油少許
1. 薯仔去皮切小粒，放入滾水中煮熟，盛起趁熱壓成薯泥。
2. 菠菜去莖後切碎，甘筍去皮切碎備用。
3. 平底鍋中燒熱少許油，倒入甘筍炒2分鐘，再倒入菠菜碎炒熟盛起。
4. 將菠菜甘筍與薯泥混合，再用手壓成手指條狀。
5. 美的健炸寶預熱180度5分鐘，將薯泥手指餅放入炸籃中。
6. 用180度烤15分鐘，中途翻動底面一次，即可。
菠菜好快熟，基本上炒幾下已經熟哂。
整薯蓉時要小心啲小薯粒，如果寶寶未有好多牙齒，
又或者咀嚼能力未夠，一定要將小薯粒挑走呀。
烤到中途取出，底面調轉繼續烤。
小菜苗一睇到呢啲手指餅，怕怕醜咁暗喜，
然後乖乖咁拎一條食下，都未食完又拎多條啦。
呢款蔬菜薯泥手指餅係下午茶係嘅不錯選擇嚟架，大家都試下啦。
沒有留言:
發佈留言