[I Love Travel] 日本2014 ~ 立山黑部5天4夜之旅 (Day2)

 Day 2

上高地~遠足行

第二朝一早起身，6:30要出發，

所以6:00就要食早餐，芙芙同大姊唔放過浸溫泉嘅機會，

一早5點幾已經起身浸溫泉啦，睇下出面嘅景色幾靚。

睇下個山仲有雪架，可想而知我哋距離雪山唔遠。

食飽飽早餐，又要係咁搭車啦，

呢個團係好多搭車時間，但每到一站都係非常之靚，

可以話搭咁耐都抵呀，一見到景色咩都唔記得啦。

到達上高地，大家齊齊遠足行。
睇下大和嘅人幾寫意，喺度對住雪山寫生，
芙芙真係好羨慕，呢種生活好舒適。

睇下佢哋畫啲咩，在水中央嘅小船呀。

再行入啲，就見到一個大石灘。

真係俾群山圍繞，感覺好正呀!

上高地簡介，不過唔識睇日文。

睇下啲河水幾清澈，芙媽同芙芙都係咁話，
好想裝啖嚟飲，應該好冰涼。

一邊行一邊望住啲雪山，好似三角朱古力。

芙芙好喜歡呢兩張相，條河有三種顏色，

親眼望到時，真係眼前一亮，

不禁讚嘆造物主嘅大能，何其偉大!

芙芙同家人沿路仲坐下抖下，見到啲日本人食便當，
其實芙芙都開始肚餓，都好想一試郊外食便當嘅感覺。

好快芙芙一家已經到達河童橋，河童就唔見，

人就有好多，成條橋企滿哂人，

想影張靚相都難，收住貨先啦。

行咗兩個幾鐘(印象中好似係)，可以食飯啦。

炸豬排飯，好好味，

豬排好厚又juicy，好抵食呀。

芙爸話想試下呢條魚，感覺好似食沙甸魚，

唔知係咪真係沙甸呢？芙芙唔識分。

呢個炸雞排真係不得了，大家一人一件，

真係唔夠喉，因為實在好味。

芙芙好欣賞呢個雞排後面嘅沙津，好似係牛蒡，

食咁多炸嘢好油膩，沙津中和哂。

食飽lunch就起程返起點啦，跟住又係搭幾個鐘車到day2嘅溫泉酒店啦。

呢一晚食晚餐就唔駛急啦，不過溫泉唔係24小時，

所以都係要食快啲，再浸個夠。

呢個三文魚都不及下圖嘅魷魚，唔係唔好味唔新鮮，

而係啲魷魚太甜太有鮮味啦，芙芙勁食呀! 

呢晚晚餐唔係太多嘢食揀，食個烏冬頂頂肚。

接住就係day3，即係呢個旅程嘅重點，

雪山，立山黑部。