香炒海茸 (附食譜)

前排芙芙成日打稿，好多人都會以為芙芙就係個配音員，
其實唔係，芙芙只係做份配音稿，
做完就等配音員核對，再交俾配音嘅人去跟住份稿去配音，
所以大家唔駛諗住可以喺電視聽到芙芙把聲，加上最近都冇咩稿打，
而家真係好休閒，可以做多啲自己嘢。

香炒海茸 食譜

材料: 乾海茸1碗、青紅尖椒各1條、蒜蓉1湯匙、薑絲少許

調味: 生抽1.5湯匙、糖1.5茶匙、鹽少許

1. 乾海茸以凍水浸20分鐘，清洗備用。

2. 平底鑊燒熱油，加入蒜蓉及薑絲爆香。

3. 加入青紅椒輕炒至熟，倒入海茸快速炒熱。

4. 加入調味輕炒一會，即可。

海茸炒至卷起即可，不可炒太久，

因為受熱太久會熔掉，口感會變得漿口。

海茸另一個名叫龍筋，近來芙芙喺教會附近，

都見到有得買，不過價錢就......都幾貴下。

所以芙芙次次都叫朋友喺順德買返嚟，雖然都唔係太平，

但一包可以食好耐，涼拌又得，

打邊爐又得，仲可以做小菜。