<美的蒸氣焗爐食譜> 親子廚房-沙津醬腸仔包

自從搬屋之後，家中嘅焗爐一直被收起，

已經好耐冇焗麵包啦，再加上生完妹妹之後，

個人記性差咗，有時蒸煮煲水後，就會突然忘記，

有次更煲到一滴水都冇，全個鍋燒到熱騰騰，

好在工人姐姐入去發現，諗起仲係好驚。

自嗰次之後，好多朋友同事都建議我用蒸焗爐，

蒸煮時唔駛睇火，又可以焗烤，

呢個建議真係非常之好，於是我就入手咗美的新推出的蒸氣焗爐，

用過之後真心覺得呢件產品應該一早就要出現，點解咁遲先嚟我屋企呢？

沙津醬腸仔包 食譜

麵團材料：高筋麵粉250g、水 100ml、蛋 55g(大蛋一隻)、

牛油 15g、糖 15g、鹽 2g、酵母 4g

其他材料：腸仔4條(切半)、沙律醬適量、番茄醬適量、蛋黃液1隻

麵團製作：

1. 將麵團材料放入廚師機中以1-2檔揉成團，再揉至起筋。

(1檔打5分鐘成團，再打2檔至起筋，約5分鐘。)

2. 加入室溫牛油，2檔揉至牛油被充分吸收，再轉3檔揉至擴展階段。

3. 將麵團放入蒸氣焗爐，用發酵功能30度發酵45分鐘。

4. 取出麵團分成50-55g的小麵團，排走空氣後搓成圓形，蓋上保鮮紙後醒十分鐘。

造型：

1. 將麵團搓成長條形，於頭尾沾水再黏成冬甩形，再輕輕拉長，於中間空位放入腸仔。

2. 完成後放入蒸氣焗爐中，二次發酵30度30分鐘至雙倍大。

3. 取出發酵後的麵包，並掃上蛋液，再唧上沙津醬及茄汁。

4. 放入蒸氣焗爐，選用無預熱蒸氣烤焗，190度烤約15分鐘至表面金黃即可。

揉到麵團起筋就可以加入室溫牛油。

到以下呢個擴展階段時(有少薄膜但又比較易斷)，就可以發酵啦。

利用蒸氣焗爐發酵，除了可恆溫於理想溫度外，

還可靠爐內的蒸氣提供理想濕度，讓麵團充分發酵。

揀選Fer-mert功能，再調節時間與溫度。

完成發酵嘅麵團，用手指篤一下，

麵團唔會回彈，同時又唔黏手就代表發酵完成啦，
睇下蒸焗爐發酵出來嘅麵團幾漂亮。

小菜苗都想幫手排氣呢。

總麵團425g，分成8份，可做出8個迷你沙津醬腸仔包。

搓成幼條狀後，再用水沾到頭尾，再黏成圓形。

慢慢輕輕拉出橢圓形，放入腸仔。

小朋友可以幫手沾水，仲有放入腸仔嘅步驟。

完成造型之後，再放入蒸氣焗爐進行二次發酵。

發到兩倍大，就可以塗上蛋黃液啦。

無預熱嘅蒸氣烤焗，螢幕會顯示爐溫慢慢上升。

此包平時用普通焗爐大約以170-180度烤20分鐘，

而呢部蒸氣焗爐嘅蒸焗溫度最低係190度，所以今次就用190度蒸焗，

雖然溫度高啲，但冇出現好快烤燶表面嘅情況，證明爐溫都幾均勻。

而且一整盤麵包嘅上色度都唔錯，唔會因位置問題而影響上色。

小菜苗非常喜歡呢個腸仔包，仲一下子食咗兩個半。

只係揉到擴展階段嘅麵包都好鬆軟，非常美味。