<自家製番茄醬汁> 茄汁肉丸

小菜苗2歲時參加過一陣子嘅學前班，一星期返三日，

當時嘅佢要面對屋企多咗一位工人姐姐，又有一個初生嘅妹妹，

同時第一次返學上堂，對兩歲嘅小朋友嚟講，

似乎太多新環境同新角色要適應，一下子未調適得到，

佢嘅情緒每日都好大起伏，有時打人有時尖叫，

於是我哋決定退出學前班，讓佢慢慢習慣下生活上嘅轉變先。

好記得佢入班時，剛剛好係搞生日會嘅月份，

我第一次以媽媽身份整小食俾阿女帶去開生日會，

而且我哋仲可以一齊出席，好似觀堂咁，

第一次見到菜苗返學個樣，到今日我都無忘記到。

我自問唔係一個咩都追求天然無調味嘅媽媽，

因為要太早起身，所以都會選擇用現成嘅肉丸，

不過醬汁就係自家製，今次同大家分享下呢個醬汁嘅做法。

茄汁肉丸 食譜

材料：番茄3個、洋蔥半個(切碎)、蒜茸2湯匙、
番茄醬2湯匙、糖2茶匙、鹽少許、肉丸300g

1. 番茄去皮後切件，以攪拌機攪成鮮茄汁。

2. 肉丸放平底鍋中煎熟，盛起備用。

3. 同一鍋中燒熱油，中火炒軟洋蔥碎，倒入蒜茸炒一會。

4. 將鮮茄汁、番茄醬、糖倒入煮至滾起，再遂少放入生粉水煮至醬汁變濃。

5. 加鹽調味後，倒入肉丸拌勻即可。

鮮打嘅茄汁用嚟煮醬會有啲酸，所以要加少少現成茄汁同糖調好味。

鮮打嘅好處除咗天然啲，仲會更有口感。

除咗煮肉丸，仲可以煮肉碎，

用嚟撈意粉食都好正架。

今次肉丸配住軟綿嘅薯蓉，換做小杯裝其實會更似PARTY小食，

但實在冇咁多空間整，一盒過就算了。