[簡易] 涼拌苦瓜 (附食譜)

早幾個月仲成日去睇醫生，
因為坐骨神經痛，到早個月，
芙芙去咗睇中醫診所，個醫師話我個盆骨歪咗，
再加上一年多前跌倒，影響咗，
於是我睇呢個醫師睇咗一個月，情況真係有明顯改善呢。

醫師除咗會幫芙芙針炙之外，仲會有手法治療，
即係將盆骨慢慢推返位，但唔係一次就可以，
要慢慢，仲要配合自己平時嘅姿勢，
芙芙仲因而知道自己有長短腳(其實好多人都有)，可能因為咁，
所以行路有神經痛嘅腳會有拉扯不適，呢個係芙芙推理出嚟嘅。

唔知大家有冇識人都有坐骨神經痛呢......?

簡易涼拌苦瓜 食譜

材料：苦瓜1條

汁料：蒜蓉辣椒醬1-2湯匙、豉油1湯匙、麻油、糖少許

1. 苦瓜去籽去膜，切薄片。

2. 苦瓜片加少許鹽拌混，待一會以開水沖洗。

3. 將汁料與苦瓜片混合，放入雪櫃待涼即可食用。

其實睇呢個醫師，唔可以話完全非常之好，
因為有時做完手法後，唔係次次都會覺得好咗，
芙芙都係做咗1個月，見個醫師似乎已經唔太答到芙芙問題時，
先至決定暫停，睇下唔睇會唔會嚴重咗，
感恩嘅係芙芙已經暫停睇咗成個月，都冇嚴重到，
雖然有時都會好唔舒服，但做下舒展又會好啲架啦。

芙芙有時都會諗，而家先廿幾歲女，
就有呢啲痛症，老咗點算呢？

身邊有好多人都叫芙芙要襯後生睇好佢，但芙芙成日都諗，
「我夠想啦，都唔知睇咩先至會好」，
於是芙芙咩都試下，物理治療啦，
中醫手法+針炙啦，艾灸啦，
都試過，話時話艾灸個效果唔錯，
但太臭，唔可以成日喺屋企做，
所以做做下又冇做到，芙芙都好想治本治好佢呢。