味噌鯖魚 (附食譜)

大家好，好耐冇見啦，
唔知道芙芙潛水嘅呢段日子，大家係咪都繼續快樂咁生活呢？

講真真係有啲失禮慚愧，芙芙早排想登入個blog，
先發現自己連呢個account個login同password，都忘記咗，
最尾試咗好多次，終於成功啦！

報告一下最新近況先，芙芙依然努力打配音稿賺外快，
繼續接Job做Emcee，但係前排身體唔太舒服，
坐骨神經痛，patpat側後面痛，
膝頭又痛，有時仲扯住到小腿腳底，
睇醫生都睇到忙，所以唔好講煮嘢食啦，
心情都冇哂，雖然而家都仲有唔舒服，
但比起幾個月前，真係舒服返好多啦。

味噌鯖魚 食譜

材料: 鯖魚半條、乾昆布1/4碗

汁料：味噌1湯匙、料酒0.5湯匙、糖1.5茶匙、
鹽0.5茶匙、生抽1湯匙、辣椒1條(切絲)

1. 鯖魚洗淨，切成4份割花備用。

2. 煮滾水，放入乾昆布煮成湯汁。

3. 盛起昆布，放入鯖魚煮5-6分鐘。

4. 將汁料材料混合，倒入鍋中與鯖魚共煮約10分鐘。

5. 盛起鯖魚，將汁料煮至收乾後淋上鯖魚面即可。

呢個菜式嘅汁好惹味，咪睇啲汁好似稀稀哋，

但其實好夠味，差啲想飲埋佢。

雖然芙芙唔敢講會繼續成日寫blog，但都會盡量寫，
最近想試下多啲素食，因為都想健康d，
其實係想減磅，希望減咁啲肚腩，
等個人冇咁重，對腳負荷冇咁大，
神經痛同膝頭痛，希望就可以減輕啦。