你想講咩，WHATSAPP我! (蒜香三文魚 - 附食譜)

早兩日o係爭鮮買左盒三文魚雜，雖然好似得d邊好少咁，

但原來整到出黎都有成碟，食到好飽!

蒜香三文魚  食譜

材料: 三文魚邊、辣椒粉、蒜鹽

醃料: 鹽、糖、豉油、蒜蓉醬、少許料酒、胡椒粉、生粉

1. 將三文魚邊洗淨，以醃料醃2小時。

2. 焗爐預熱200度，將三文魚排好放入。

3. 焗約15-20分鐘，上碟。

4. 吃前加入辣椒粉、蒜鹽便可。

因為三文魚多皮，焗出黎好多油，

基本上大家若無焗爐，煎都一樣可以，

而且仲唔洗落油tim，因為三文魚本身已經好多油份啦!

睇下焗左幾多油出黎，上碟前可以用吸油紙吸吸先!

近排同班朋友食飯，講起依家d電話，

有朋友話見過有人同枱食飯時，竟然唔講野但用whatsapp傾計，

面對面開口都懶，但成日咁寫字法，

對手唔累ga咩?講真我就唔太喜歡用呢d通訊app。

我認同whatsapp係方便，問問題時真係好方便，

但如果你係要答人o個個，就真係要好似寫論文咁解釋過人聽，

真係多謝哂，解釋到手都軟!

就好似我做拍賣咁，有人問野留電話，

跟住都加多句"whatsapp我"，我想講其實我好唔like用whatsapp，

有咩問講出黎咪得囉，點解要逼我用whatsapp寫論文咁解答你呢?

明明大家可以用口講，但就依家就改用message，

有人話可以慳返d分鐘，講幾句用得你幾多分鐘呀?

呢個理由唔太合理，"唔方便講電話，whatsapp唔駛俾錢又可以聯絡到人"呢d理由就正常d。

whatsapp係有令人方便左，但同時亦有帶到麻煩俾人，

我就偏向同人真情對話，多過對住部電話用文字表達啦，

所以就算用whatsapp，我都會用錄音功能逼朋友聽下我把聲，

以免有日大家忘記左聲音，口同耳都一齊退化就唔好啦。