三色椒炒米粉 (附食譜)

早幾日去左廣州順德行下，好耐無食陶陶居，

入到去等位以為要等好耐，好彩等左一陣就有位，

因為好多人都好似我地咁，以為仲有幾十張而走左去，

走下走下就漁人得利啦!點知叫位姐姐又skip左我地個no.，

由89一跳跳到102，我地就係98號，

問叫位姐姐叫左98未，她竟然話叫左，

唔通我耳仔有問題?於是我就話"你根本無叫到"，

她就即刻收左我地張飛，即安排張枱俾我地。

當日陶陶居叫左個三絲炒米，出到黎個樣好似粉絲，

因為我個朋友唔食得粉絲，所以我一個人食左大半碟，

晚上去第二度食又叫多次炒米，點知又係有d似粉絲，

如是者我一日入面食左兩次炒米，唔知定炒粉絲啦。

返到香港忍唔住，就炒左個真正的炒米粉食下!

今次唔會變粉絲啦!就用三色椒炒啦!

三色椒炒米粉 食譜

材料: 三色椒、米粉、豉油、糖

1. 將三色椒切絲，備用。

2. 米粉先煮熟，過冷河備用。

3. 燒熱油炒香三色椒絲，加入米粉炒。

4. 再加入豉油、糖繼續炒至鬆身。

炒米粉材料可以好豐富，例如肉絲、芽菜、蔥、火腿等，

喜歡的話海鮮炒又可以，又一百搭飽肚之選!