2014年9月1日 星期一

[I Love Travel] 日本2014 ~ 立山黑部5天4夜之旅 Day3

Day 3
立山黑部

一早出發,食個靚早餐先。

芙芙嚟到日本,食早餐時最愛食腸仔,
仲要加啲芥末籽,好好味呢~



呢個豆腐超級好味,又重豆香又滑。


食飽早餐晨早出發到立山扇沢,再轉車到水壩。



水壩嘅風景好靚,睇下我哋同雪山越嚟越近啦。



如果再過多一段時間嚟立山,係可以見到水壩放水嘅景色架。



欣賞完水壩景色,我哋就要轉纜車上黑部平啦。

睇下條軌道幾斜,芙芙大姊因為有畏高,
搭呢程車時已經手心冒汗,完成唔可以望下面呀。


由水壩到黑部平,車程只需要十多分鐘,
要上立山真係唔係講玩,車都轉好多次,
種類仲有好多款,真係一日內搭足哂。


準備要轉吊車到大觀峰,芙芙大姊已經好緊張啦,
因為吊車係好高架,而且車箱仲要係透明架。

呢張相就係車箱中影架啦,睇下透明度幾高,
估佢唔到嘅係,芙芙大姊呢程吊車竟然唔驚,
因為成程都好穩定,定過海x公園嘅吊車好多。


雪山呀雪山,芙芙嚟啦。

到達大觀峰,準備要轉巴士到最高點室堂,
亦即係呢次旅程嘅高潮,雪之大谷所在地。

雪山只係喺眼前咋,好興奮呀!
大觀峰呢度有一樣手信一定要買,就係巨峰提子乾,
真係超甜,超好味,一包先幾十蚊,不過買得多就好重,
之後行程仲好長,芙芙同家人都係買咗幾包就收手啦。


轉眼間搭咗咁多程車,終於到達室堂啦。
氣溫亦都越嚟越低,芙芙家人已經著哂褸準備出發睇雪,
睇雪前都要醫下肚先,食飽飽至玩。


呢個係個團安排嘅野菜餐,份量唔多。



芙芙望住對面枱(另一團人)嘅食物,心諗人哋一定係豪華團,
有蝦食之餘,賣相仲更加精緻。



其實都唔係純野菜嘅,都有雞肉食架。

食飽我哋就先去睇下雪景,玩下雪先。

一望無際嘅天空,加上白濛濛嘅雪地,
芙芙好開心呀!第一次見到雪咋!




雪反射真係好厲害,芙芙家人一到雪地已經除哂啲褸,
一啲都唔凍,芙芙仲第一次玩雪球添。




嚟到雪地,大人都變細路呀。





一望無際嘅雪景,喺雪地任我行,
感覺真係好爽,但又好怕跌倒喎。
(芙芙有坐骨神經痛,再跌就大獲啦)

轉個身我哋就嚟到名勝景點,雪之大谷。


雪之大谷呢個雪牆,究竟係點做出嚟架呢?


就係靠呢部剷雪車啦,原來立山冬天時會俾雪遮蓋,
日本人就會用衛星去探測返條路,定好條路線,
再用剷雪車剷返出嚟,於是就形成雪之大谷啦。


成條雪之大谷都幾長架,猶奇我哋玩完雪,
已經有啲攰攰哋,可能因為咁覺得條路都幾長。


芙芙同大姊沿路仲見到有人用雪牆囓雪,整咗個小雪人,
好可愛架,不過張相喺大姊度。

行到攰攰哋,成團人就轉搭觀光巴士,
遊覽一下立山嘅風景,芙爸好醒,
話唔駛搭車影相咁麻煩,直頭錄片就ok。

段片喺芙爸度,又係冇貨俾大家睇。

遊覽完就到美女平轉纜車到立山站,再轉旅遊巴到Day3晚上酒店。



呢晚嘅溫泉酒店,又喺係座山度,
周圍嘅建築都係好似瑞士嘅西方建築,好似置身喺飄零燕入面咁架。

當晚晚餐又係食同樣嘅嘢,所以冇影啦,
不過浸完溫泉,發現酒店外面嘅天空,
原來滿佈星星,即刻叫芙媽一齊睇,
過咗一個浪漫嘅晚上,望到星星就好似望到二家姐咁呢。

10 則留言:

  1. 回覆
    1. 殷師奶,yes,
      山區溫泉好正架,不過就唔係好似睇電視咁,
      間間都有得對住個山景/天空,有啲係就算室外都俾嘢圍住,
      冇咩嘢睇,反而第一晚間溫泉酒店就好好view。

      刪除
  2. 野菜餐有啲空虛喔。。。
    溫泉+buffet>>>>>好正!!!

    回覆刪除
    回覆
    1. Li J,真係有d空虛感,
      可能當地天氣又清涼,所以都幾有食慾,
      但就只有野菜餐,所以都咪話唔空虛。

      刪除
  3. 山區溫泉吾錯喎, 我都鐘意星. ^^

    回覆刪除
    回覆
    1. mickey,山區睇星真係一流,
      成天都係,好似360度自轉都睇到星咁呢。

      刪除
  4. 芙芙,二家姐永遠與你們常在,深信她在遠方一定生活得很好!

    回覆刪除
    回覆
    1. 小高,芙芙都係咁諗,
      希望二家姐而家喺天家都過得好啦,謝謝你呀小高。

      刪除
  5. 芙芙~你個trip 睇黎玩得好開心呢~!

    回覆刪除
    回覆
    1. 黃師奶,係呀係呀,
      真係玩得好開心呀,而且成團人都好準時,
      四十幾人都好準時,而個導遊又超好笑,
      d景又靚,真係超enjoy呀。

      刪除