2013年6月9日 星期日

意外,即係意料之外 (附涼拌黑木耳食譜)

記得以前有個廣告,dodo姐有句對白"意外,即係意料之外",
呢句野真係千真萬確,唔踢波就唔會整親腳呢d concept係錯ga!

實不相瞞,早個幾星期的某一個早上,
我搭巴士返工時,o係巴士上層跌左落下層,
唔係因為我無捉緊扶手,而係因為轉彎太快,
就算抓住左都失哂平衡,當時我已經係等紅燈停定左先落下層,
點知咁岩又好快轉燈,只係落左兩級樓梯已經被揮跌左。

於是一下兩下三下,足足跌左三級樓梯,
級級都登到個屁股,最尾一下仲登到條尾龍骨。
於是我望向司機,司機只係望一望無出聲,
然後繼續駕車,反而有位乘客走前黎扶起我去櫈度坐。

埋站後我見自己行到就落左車,點知一路行一路痛,
返到公司就俾同事的左去急症室,雖然照過X-ray話d骨無事,
但我到依家都仲痛緊,所以前幾日去左睇骨醫跌打。

因為咁我琴日已經聯絡左巴士公司,希望會有適當的處理啦。

呢件事令到我更明白身體係好緊要,意外我地預料唔到,
但健康可以由日常生活而建立,今次要同大家share下呢個健康小食。



涼拌黑木耳 食譜

材料: 黑木耳、冰糖、辣椒粒、蒜蓉、鎮江醋

1. 將黑木耳浸水,浸至發大及軟身就可撕成細塊備用。
2. 將黑木耳放入滾水煮熟,待涼。
3. 將辣椒粒、蒜蓉、鎮江醋與黑木耳拌勻。
4. 加入少許冰糖,放入雪櫃雪1至2小時即可


冰糖唔駛落太多,亦都唔駛等到溶哂至雪,
因為雪的過程會自動溶化,食前拌一拌就可以啦,
冰糖係用黎中和醋的酸,但如果落得太多冰糖,
黑木耳就會吸左太多甜味,到時再落更多醋都唔會中和到ga啦。

黑木耳對身體係好好ga,可以降低血脂呢!

人的身體真係好重要,健健康康當然好,
但學dodo姐咁話,意外即係意料之外,
凡事都係小心為妙,免生意外搞到傷身又破財(好押韻!)。

沒有留言:

張貼留言