2013年4月7日 星期日

紅粉霏霏 - 入伙大吉 (附咸湯丸食譜)

話咁快我地一家由新界區搬左出黎市區啦,認識我的朋友都知道,
上年8月我地一家發生左一件十分悲痛的事情,其實到依家都係悲傷之中,
就係因為咁,我地一家就搬離左充滿回憶的屯門區,
希望新地方,好開始。

客家人有個傳統,新居入伙要食咸湯丸,
係咪未見過咁紅的湯呢?秘密就在於紅粉啦。



一大早姑媽就黎到我地新居,手攜紅粉及100蚊咸豬骨,
到步無耐就動手整湯圓粉團,其中一團加入左紅粉。


咸湯丸 食譜
材料: 
湯圓: 糯米粉、溫水適量、紅粉適量
湯: 100蚊排骨、蔥頭適量、蝦米1碗、蔥花少許
做法:

1. 排骨用鹽醃一晚,備用。
2. 糯米粉(可加紅粉成紅湯圓)逐少加入溫水,一邊用筷子攪動至形成粉團。
3. 粉團揉合好後,分開成一個個拇子大小的小粉團。
4. 手揉至圓形,完成。
5. 蔥頭切塊備用,蝦米以水浸開。
6. 咸排骨汆水備用,落油爆香蔥頭。
7. 加入咸排骨略煮,倒入適量水及蝦米。
8. 待湯滾至材料出味,加入湯圓煮滾。
9. 加入蔥花,完成。


紅色湯圓加紅粉就變成咁啦,幾過癮。


睇睇我整的掌上明珠,幾圓呀!


由細到大我都喜歡咸湯丸多過甜,其實個湯好緊要,
可能爸媽煮得個湯好入味,所以我次次都會飲得乾乾淨淨。

煮咸湯圓切記湯丸唔可以太大粒,因為入面無料,
所以太大會成口都係粉團,食多兩粒就會好飽,
如果細細粒咬口又好d,又唔會太飽而飲唔落d湯啦!


搬左屋返工比以前無咁方便,放工都要搭好耐車至返到屋企,
老實講有點兒唔習慣呢,不過好在有幾位好同事都住呢頭jei,
話哂都叫做有個伴,無咁悶呀ma!




沒有留言:

張貼留言